قواعد سيدونا

"الحقيقة بسيطة ولو كانت معقدة لفهمها جميع البشر"
 ليستر ليفنسون مكتشف سيدونا

**كل واحد الترحيب بتاعه بيختلف عن الترحيب للشخص الاخر فيه اللي لما بيرحب بالشعور بيحس بيه وبيديله حقه وفيه اللي بيحس الشعور كله في قلبه وبيتحرر بيه بالاسئلة وفيه اللي بيتخيل الشعور بعد ما جمعه في قلبه انه بيطير منه زي الدخان مش كلنا لينا نفس الترحيب الاهم انك تتحرر من الشعور ده بطريقتك 

طريقة التحرر من الخوف 
**الترحيب في الرغبة في حدوث الشئ الذي تخاف منه ثم ال3 اسئلة  : can I let go ? would I let go ? when?  



**للتحرر من عادة متأصلة فيك بأستخدام سيدونا كل ما تحس بالرغبة في القيام بيها اعمل علي رغبتك دي سيدونا وبعد كده اعمل العادة دي عادي وفي فترة لا تتجاوز 4 ايام او اقل هتتخلص منها 
**لما تيجي تتحرر من المعتقد او الشعور اللي مضايقينك متحطش في دماغك انك لازم تتخلص منه حط في دماغك انك تديله حريته هو الشعور ده ولو معرفتش تتحرر منه اعرف انك بتجبر نفسك علي التحرر ساعتها خد قرار مع نفسك انك سواء اتحررت او لا انت راضي بالشعور ده وبأذن الله هتلاقي نفسك اتحررت 

**اكتر سؤال بيتسأل في التحرر هو ازاي ارحب بالشعور والسؤال مش بيتكرر من اللي بدأ استخدام سيدونا جديد بالعكس بيبدأ مع اللي بقاله فترة بيستخدمها وانا مريت بالموضوع ده 
لو سألت نفسك ليه في الاول تخلصت من الشعور اللي كان سبب ضيقك وتعاستك في الحياة بسهولة في المرة الاولي؟ 
هتلاقي الاجابة بسيطة انك كنت طول الفترة دي محضر الشعور فلما عرفت سيدونا مخدتش وقت للترحيب بيه علشان تتحرر منه لان الترحيب هو انك ترضي بالشعور ده انه ملازمك علشان الشعور ده بيسبب امان للبراديم عندك فبمجرد ما انت رحبت بيه خلاص كنت انت فعلا خلصت الخطوة الاولي بسرعه
معلش للتطويل في الشرح بس علي العموم الحل انك تفتكر الموقف اللي ضايقك في شكله الاولي وتفتكر ازاي كانت نفسك بتسخنك وبتزود عندك الغضب او الحزن وبعد كده ترحب بده كله
هدي مثال علشان نفهم اكتر
انت اتصدمت ان واحد صاحبك جدا كان بيغشك من وراك وعرفت عن طريق حد انت واثق منه واكدلك
افتكر اول ما الشخص ده قالك الكلام ده افتكر الصدمة ساعتها كويس وحس بيها تاني وافتكر كل سؤال كنت بتسأله لنفسك ليه اللي كان بيخليك تتضايق اكتر زي ليه عمل كده؟ انا عمري اذيته؟ وافتكر لما جاتلك الافكار بأنك عاوز تنتقم منه وانك لما هتشوفه هتموته وكل الافكار دي وبعد كده وقف افكارك لمدة ثانيتين وبعدها رحب بالشعور ده كله وبعدها مارس سيدونا عادي جدا 


سيدونا الجسد ببساطة 

**اتحرر من رغبتك في التحكم في شكل جسمك اولا (وده الاهم الرغبة في التحكم)
وبعد كده فيه اكتر من طريقة علشان تجمع باقي المعتقدات بس اظن اسهلهم ان الشخص يقف قدام المراية ويشوف احساسه ايه بشكله ويتحرر منه وبعد كده يشوف كل تفصيلة مضايقاه في جسمه ويتحرر منها 
وبعد كده يتحرر من معتقداته الخاصة تجاه الطعام والشبع ويشوف امتي اكتر وقت بيأكل فيه والسبب اللي بيخليه يأكل كتير (زي الهروب من المشاكل بالاكل ) 
ملاحظة سيدونا الجسد بطيئة شوية بس فعالة بأذن الرحمن 

**الشعور مش شرط يبقي من طبقة واحدة لو شعور جديد او موقف جديد اتحررت منه مش هيطلعلك ليه طبقة تانية من الشعور انما لو موقف حصلك وبعد ما اتحررت منه طلعلك شعور تاني مضايقك معناه ان الموقف ده ليه جذور تانية اتحرر منها ومتتضايقش انها ظهرتلك بالعكس افرح من سهولة ظهور الشعور ده لان ممكن الشعور ده يحررك من مئات من الذكريات والمشاعر السلبية اللي متأصلة جواك 
بأختصار الشعور في احيان كتير بيبقي زي (البصلة ) عبارة عن طبقات ورا بعض فمتيأسش من التحرر منهم 


**كل واحد بعد التحرر من الشعور بيحس بشعور بيختلف من شخص لاخر فيه اللي بيحس بالفراغ بعد التحرر وفيه اللي بيحس بالخفة والنشاط بعد التحرر وفيه اللي بيحس بسعادة بعد التحرر متربطش نفسك بشعور حد معين بعد التحرر لان ممكن بعد التحرر يكون شعورك غير ده كله اصلا الاهم انك تحس ان الشعور اللي مضايقك خد حريته 

**لو في يوم جيت تتحرر وحسيت انك متمسك بالشعور اسأل نفسك 
لو في ايدي اني انا اتحرر من الشعور هتحرر منه ولا لا ؟
وساعتها بأذن الرحمن هتلاقي المقاومة اختفت مهما كانت الاجابة 
لانها لو ايوة يبقي المقاومة مش موجودة ولو لا رحب بالرفض ده والمقاومة دي واتحرر منها 


**علشان تسهل التحرر علي نفسك متبصش علي التحرر انه شئ صعب او انه عملية عسكرية هتقوم بيها بص للامر وكأنه لعبة هتلعبها واللعبة عبارة عن انك هتحس بالشعور وانت مش متضايق منه 
كأنك بتلعب استغماية مع طفل وبعد ما لقيته قعدت تتكلم معاه شوية وسبته بعدها 
ده بالظبط اللي تعمله رحب بالشعور وحس بيه واتحرر منه وكأنها لعبة من غير ما تفكر في نتايج ولا تضغط علي نفسك just take it easy


**حاول تمارس سيدونا كتير في يومك العادي لغاية ما تبقي اول حل ليك لاي مشكلة لان احسن وقت للتحرر من شعور طارئ هو وقت المشكلة

**لو عندك مشاكل مع جذب الاهداف عموما بسيدونا درب نفسك بشكل بسيط جدا جدا جدا علي جذب اهداف سهلة نسبيا مثلا لو حتي برفيوم ب 50 جنيه ولو غالي عليك اجذب كيس شيبسي ب 5 جنيه 😃 هي اصلا خطوة مش محتاجه منك انك تجذب لانك بتعملها بشكل سلس بس بعد كده ابدأ اتقدم واجذب حاجات اصعب نسبيا هتلاقي نفسك بتشوف الاختلافات والمشاعر والمعتقدات درب نفسك علي التحرر منها مثلا لو طالب جامعي حاول تجذب 100 جنيه من غير سبب وتدرج لغاية ما تبقي فاهم ازاي انت بتجذب لان الجذب علي الرغم انه خطواته ثابته بس بتختلف من شخص لاخر تنفيذها انت درب نفسك تدريجيا وان شاء الله يبقي الجذب معاك اسهل

سيدونا الدراسة 

اولا عاوزين كلنا نتفق ان الدراسة موضوع نفسي بالدرجة الأولى ف سيدونا بتسهل تقبل الموضوع 
ببساطة اقبل شعور انك تسقط 😃 عارف ان كلامي صادم بس بتكلم عن تجربة شخصية لمادة دخلتها وانا مش مذاكر منها غير 7% تقريبا او اكتر وجبت فيها جيد بفضل الله 
تخيل انك سقطت وانك شلت المادة وانك خلاص تقديرك راح وكل حاجه من ده ورحب بده كله واتحرر منه 
علي العموم انا عملت كده وجالي من ضمن ال7% اسئلة كفيلة للنجاح المؤكد بفضل الله 
علي العموم موضوع السقوط ده انا عارفة وكان عندي حرفيا فوبيا منه لدرجة بتوصل الإغماء واتمني لو كنت مروحة او علبة سيريلاك 😃 بس في مرة والدتي قالتلي كلمة (مش هنموتك لو سقطت هما يومين وهيبقي الموضوع عادي) وفعلا كل ما دون الموت هين انت ببساطة تاني رحب برغبتك في السقوط (شرحتها في سيدونا الخوف) وبعد كده ذاكر هتلاقي ان الضغط اللي عليك راح والمذاكرة ابسط وبرضو اتحرر من رغبتك في المذاكرة او حركة ابسط انك فجأة اقعد علي الكتاب وذاكر ومتفكرش في حاجه مجرد انك ذاكر وبس
وبرضو وقت المذاكرة طول ما المادة مش مترتبه علي بعضها ببساطة ذاكر السهل كله اولا وبعد كده المهم والباقي براحتك ذاكره وحاول انك تنسق وقتك مع اصحابك علشان تخلصوا حاجات وكميات معينه وتكون الاهم
وبرضو لو تقدر تتمشي كل يوم شوية او حتي cardio هيبقي مفيد جدا علشان متحسش بالنوم وقت المذاكرة
(التحرر من السقوط+ التحرر من النجاح+التحرر من الرغبة في انهاء كمية معينه لليوم ده)

محمد عصام / قواعد سيدونا
للإنضمام لجروب سيدونا المرجو الدخول للرابط أسفله
Sedona Groupe