سنة 1964 بيتر هيجز , توقع او افترض ان فى حقل او مجال طاقة بيخترق مجال الكون كله
وطبعا كالعادة سمى المجال دا باسمه " مجال هيجز او حقل هيجز . " higgs field " .
نفهم بقى الاول موضوع مجال هيجز دا عشان نقدر نفهم هيجز بوزون
السبب اللى خلاه يقول ان مجال طاقة باسم مجال هيجز هو ان محدش كان عارف ليه بعض الجسيمات التحت ذرية " مكونات الذرة يعنى " بعضها كتلته كبيرة و بعضها كتلته اصغر و البعض التانى شبه منعدم الكتلة
الحقل او المجال اللى عمنا بيتر افترضه دا بقى قال انه هيتفاعل مع الجزيئات دى فالجزيئات الكبيرة هتتفاعل معاه و و الجسيمات عديمة الكتلة مش هتتفاعل على الاطلاق .
الموضوع اتعقد اكتر عشان نفهم موضوع مجال هيجز دا هنقول مثال بسيط , عندنا مية او بحر و سمكة صغيرة و راجل طخين .
السمكة الصغيرة بتسبح بسهولة و انسيابية فى الماية
بينما الراجل الطخين دا بيسبح ببطء و صعوبة " الغالب يعنى " .
بس يا سيدى يبقى بناء ع المثال السابق المية او البحر هو دا مجال هيجز و السمكة الصغيرة هى الجسيمات اللى كتلتها صغيرة فنسبة تفاعلها مع الماء بتبقى صغيرة فتتحرك بسهولة , بينما الراجل الطخين دا الجسيمات الكبيرة بتتفاعل بصورة اكبر مع الماء فتبقى كتلتها فى المية كبيرة و بتتحرك بصعوبة اوووووووى " تشبيه سهل و بسيط صح "
نيجى بقى فى الجسيمات الذرية عندنا الالكترون هو اخف الجسيمات الذرية , بينما الكوراك القمى او Top Quark دا بيسموه ملك الكتلة حوالى 350 الف مرة اكثر " اثقل " من الالكترون .
كتلة الكوارك القمى الكبيرة مش بسبب حجمه ابسلوتلى هو و الالكترون نفس الحجم بس اللى بيخليه كتلته كبيرة و الالكترون صغيرة هو انه بيتفاعل اكتر مع مجال هيجز اللى قلنا عليه فوق بينما الالكترون بيتفاعل بصورة اقل مع المجال دا L .
نيجى بقى للموضوع الاساسى اللى هو هيجز بوزون ايه بقى هيجز بوزون دا عرفنا ان احنا عندنا حاجة اسمها مجال هيجز و شبهنا ليها بالمية . اهو هيجز بوزون دا بقى اصغر جسيم موجود فى مجال هيجز .
عشان نعرف هيجز بوزون دا اكتر نرجع تانى للتشبيه بتاع المية
عندنا طبق كبير مليان مية طبعا كلنا عارفين ان المية بتتكون من جزيئات H2O . ملايييييين من الجزيئات دى
بس يا سيدى هنقول ان المية هى مجال هيجز و الجزيئات اللى المية بتتكون منها هى دى هيجز بوزون الجزيئات دى تبدأ تتفاعل مع الجسيمات الذرية و على حسب بقى اللى يتفاعل اكتر يبقى معاه كتلة اكتر لانه بيتفاعل مع جزيئات اكتر
و هو دا هيجز بوزون المسئول عن اكتساب المادة لكتلتها
إرسال تعليق Blogger Facebook